ನಮ್ಮ ತಟ್ಟೆಯಲ್ಲಿರುವ ರಾಸಾಯನಿಕಗಳು ಭಯವಲ್ಲ, ವೈಜ್ಞಾನಿಕ ಅರಿವು ಅಗತ್ಯ!
ಶ್ರೀ ಮಧ್ವವಾದಿರಾಜ ತಾಂತ್ರಿಕ ಕಾಲೇಜಿನ ಡಾ. ಸುಬ್ಬಲಕ್ಷ್ಮಿ ಎನ್. ಕಾರಂತ್ ವಿಶೇಷ ಲೇಖನ
(Udupi) ಉಡುಪಿ: ಕೀಟನಾಶಕಗಳಿಂದ ಕೃತಕ ಮಾಗಿಸುವಿಕೆ, ಸಂರಕ್ಷಕಗಳಿಂದ ಆಹಾರ ಬಣ್ಣಗಳವರೆಗೆ ಆಹಾರದಲ್ಲಿನ ರಾಸಾಯನಿಕಗಳ ಬಳಕೆ ಮತ್ತು ಆರೋಗ್ಯದ ಮೇಲಿನ ಪರಿಣಾಮದ ಬಗ್ಗೆ ತಿಳಿಯಬೇಕಾದ ಸಂಗತಿಗಳು.
ಇಂದಿನ ವೇಗದ ಜೀವನ ಶೈಲಿಯಲ್ಲಿ ವರ್ಷಪೂರ್ತಿ ವಿವಿಧ ಹಣ್ಣುಗಳು, ತರಕಾರಿಗಳು ಮತ್ತು ಸಂಸ್ಕರಿತ ಆಹಾರಗಳು ಸುಲಭವಾಗಿ ಲಭ್ಯವಾಗುತ್ತವೆ. ಕೃಷಿ, ಕೊಯ್ದು, ಸಂಗ್ರಹಣೆ, ಸಾಗಣೆ ಮತ್ತು ಸಂಸ್ಕರಣೆಯ ವಿವಿಧ ಹಂತಗಳಲ್ಲಿ ಹಣ್ಣು, ತರಕಾರಿಗಳು ಹಾಗೂ ಸಂಸ್ಕರಿತ ಆಹಾರಗಳಿಗೆ ಕೀಟನಾಶಕಗಳು, ಸಂರಕ್ಷಕಗಳು, ಆಹಾರ ಬಣ್ಣಗಳು ಸೇರಿದಂತೆ ಹಲವು ರಾಸಾಯನಿಕಗಳನ್ನು ಬಳಸಲಾಗುತ್ತದೆ. ಇಲ್ಲಿ ಒಂದು ವಿಷಯವನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಬೇಕು. “ರಾಸಾಯನಿಕ ಎಂದರೆ ಅದು ಕಡ್ಡಾಯವಾಗಿ ವಿಷಕಾರಿ ಎಂದರ್ಥವಲ್ಲ. ಅನುಮೋದಿತ ರಾಸಾಯನಿಕಗಳನ್ನು ನಿಗದಿತ ಪ್ರಮಾಣದಲ್ಲಿ ಮತ್ತು ನಿಯಮಾನುಸಾರ ಬಳಸಿದರೆ ಅವು ಆಹಾರ ಉತ್ಪಾದನೆ ಮತ್ತು ಸಂರಕ್ಷಣೆಯಲ್ಲಿ ಉಪಯುಕ್ತವಾಗಬಹುದು. ಆದರೆ ಅಕ್ರಮ, ಅತಿಯಾದ ಅಥವಾ ತಪ್ಪಾದ ಬಳಕೆಯೇ ಆರೋಗ್ಯದ ಪ್ರಮುಖ ಸಮಸ್ಯೆಗೆ ಕಾರಣವಾಗಬಹುದು.
ಕೀಟನಾಶಕಗಳ ಬಳಕೆ
ಬೆಳೆಗಳನ್ನು ಕೀಟಗಳು, ಶಿಲೀಂಧ್ರಗಳು ಮತ್ತು ರೋಗಗಳಿಂದ ರಕ್ಷಿಸಲು ಕೀಟನಾಶಕಗಳನ್ನು ಬಳಸಲಾಗುತ್ತದೆ. ಕ್ಲೋರ್ಪೈರಿಫಾಸ್ (Chlorpyrifos), ಮ್ಯಾಲಥಿಯಾನ್ (Malathion), ಸೈಪರ್ಮೆಗ್ರಿನ್ (Cypermethrin) ಮತ್ತು ಮ್ಯಾಂಕೋಜೆಬ್ (Mancozeb) ಮುಂತಾದವು ಸಾಮಾನ್ಯವಾಗಿ ಬಳಸುವ ಕೀಟನಾಶಕಗಳಾಗಿವೆ. ಇವುಗಳನ್ನು ಶಿಫಾರಸು ಮಾಡಿದ ಪ್ರಮಾಣದಲ್ಲಿ ಮತ್ತು ಕೊಯ್ಲಿನ ಮುನ್ನ ನಿಗದಿತ ಕಾಯುವ ಅವಧಿಯನ್ನು ಪಾಲಿಸಿ ಬಳಸುವುದು ಅಗತ್ಯ. ಅತಿಯಾದ ಬಳಕೆಯಿಂದ ಆಹಾರದಲ್ಲಿ ರಾಸಾಯನಿಕ ಅವಶೇಷಗಳು ಹೆಚ್ಚಾಗಿ, ತಲೆನೋವು, ವಾಕರಿಕೆ ಹಾಗೂ ಚರ್ಮ ಮತ್ತು ಕಣ್ಣಿನ ಉರಿ ಉಂಟಾಗಬಹುದು. ಆದ್ದರಿಂದ ಕೀಟನಾಶಕಗಳ ಸುರಕ್ಷಿತ ಮತ್ತು ಜವಾಬ್ದಾರಿಯುತ ಬಳಕೆ ಅಗತ್ಯ.
ಹಣ್ಣುಗಳನ್ನು ಕೃತಕವಾಗಿ ಮಾಗಿಸುವಿಕೆ
ಮಾವು, ಬಾಳೆಹಣ್ಣು, ಪಪ್ಪಾಯಿ ಮುಂತಾದ ಹಣ್ಣುಗಳು ಸಹಜವಾಗಿ ಎಥಿಲೀನ್ (Fthylene) ಎಂಬ ಸಸ್ಯ ಹಾರ್ಮೋನ್ ಪ್ರಭಾವದಿಂದ ಮಾಗುತ್ತವೆ. ನಿಯಂತ್ರಿತ ಪರಿಸ್ಥಿತಿಯಲ್ಲಿ ಅನುಮೋದಿತ ರೀತಿಯಲ್ಲಿ ಎಥಿಲೀನ್ ಬಳಸುವುದು ವೈಜ್ಞಾನಿಕ ಮಾಗಿಸುವ ವಿಧಾನವಾಗಿದೆ. ಕೆಲವು ಬೆಳೆಗಳಲ್ಲಿ ಪಕ್ವತೆ ಮತ್ತು ಮಾಗುವಿಕೆಯನ್ನು ನಿಯಂತ್ರಿಸಲು ಬಳಸಲಾಗುತ್ತದೆ. ಎಥಿಲೀನ್ ಅಥವಾ ಎಥೆಫಾನ್ಗಳನ್ನು ಸಂಬಂಧಪಟ್ಟ ಬೆಳೆಗಳಿಗೆ ಅನುಮೋದಿತ ಪ್ರಮಾಣದಲ್ಲಿ ಮತ್ತು ಆಹಾರ ಸುರಕ್ಷತಾ ನಿಯಮಗಳಂತೆ ಮಾತ್ರ ಬಳಸಬೇಕು. ಅತಿಯಾದ ಅಥವಾ ಅನುಮತಿಯಿಲ್ಲದ ರಾಸಾಯನಿಕ ಬಳಕೆ ಸುರಕ್ಷಿತವಲ್ಲ.
ಹಣ್ಣುಗಳನ್ನು ಬೇಗ ಮಾಗಿಸಲು ಕ್ಯಾಲ್ಸಿಯಂ ಕಾರ್ಬೈಡ್ (Calcium carbide) ಅನ್ನು ಅಕ್ರಮವಾಗಿ ಬಳಸಲಾಗುತ್ತದೆ. ಕ್ಯಾಲ್ಸಿಯಂ ಕಾರ್ಬೈಡ್ ನೀರಿನೊಂದಿಗೆ ಪ್ರತಿಕ್ರಿಯಿಸಿ ಅಸಿಟಿಲೀನ್ ಅನಿಲವನ್ನು ಉತ್ಪಾದಿಸುತ್ತದೆ. ಕೈಗಾರಿಕಾ ದರ್ಜೆಯ ಕ್ಯಾಲ್ಸಿಯಂ ಕಾರ್ಬೈಡ್ನಲ್ಲಿ ಅರ್ಸೆನಿಕ್ ಮತ್ತು ಫಾಸ್ಪರಸ್ನಂತಹ ಹಾನಿಕಾರಕ ಕಲ್ಮಶಗಳು ಇರಬಹುದಾದ್ದರಿಂದ ಇದನ್ನು ಆಹಾರ ಮಾಗಿಸುವ ಉದ್ದೇಶಕ್ಕೆ ಬಳಸುವುದು ಸುರಕ್ಷಿತ ವಿಧಾನವಲ್ಲ. ಅತಿಯಾದ ಬಳಕೆಯಿಂದ ತಲೆನೋವು, ತಲೆಸುತ್ತು, ವಾಕರಿಕೆ, ವಾಂತಿ, ದೌರ್ಬಲ್ಯ ಮತ್ತು ಉಸಿರಾಟದ ತೊಂದರೆ ಮುಂತಾದ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ಹೆಚ್ಚಿನ ಮಟ್ಟದ ಒಡ್ಡಿಕೊಳ್ಳುವಿಕೆ ನರಮಂಡಲದ ಮೇಲೂ ಪರಿಣಾಮ ಬೀರಬಹುದು. ಅಸಹಜವಾಗಿ ಒಂದೇ ರೀತಿಯ ಬಣ್ಣ ಹೊಂದಿರುವುದು. ಮಾಗುವಿಕೆಯಲ್ಲಿ ಅಸಮಾನತೆ, ಆಸಹಜ ವಾಸನೆ ಅಥವಾ ರುಚಿ ಕಂಡುಬಂದರೆ ಅಂತಹ ಹಣ್ಣುಗಳನ್ನು ಸೇವಿಸುವುದನ್ನು ತಪ್ಪಿಸುವುದು ಸೂಕ್ತ.
ಹಣ್ಣುಗಳ ಮೇಲಿನ ಮೇಣದ ಲೇಪನ: ಹೊಳಪಿನ ಹಿಂದೆ ಇರುವ ಸತ್ಯ
ಸೇಬು, ಕಿತ್ತಳೆ, ನಿಂಬೆ, ಸೌತೆಕಾಯಿ ಸೇರಿದಂತೆ ಕೆಲವು ಹಣ್ಣು-ತರಕಾರಿಗಳು ಮಾರುಕಟ್ಟೆಯಲ್ಲಿ ಅಸಹಜವಾಗಿ ಹೊಳೆಯುತ್ತಿರುವುದನ್ನು ನಾವು ಗಮನಿಸುತ್ತೇವೆ. ಇದನ್ನು ಕಂಡ ತಕ್ಷಣ “ಹಣ್ಣಿನ ಮೇಲೆ ವಿಷಕಾರಿ ಮೇಣ ಹಚ್ಚಲಾಗಿದೆ” ಎಂದು ಭಾವಿಸುವುದು ಸರಿಯಲ್ಲ. ಕೊಯ್ಲಿನ ನಂತರ ಹಣ್ಣುಗಳ ತೇವಾಂಶದ ನಷ್ಟವನ್ನು ಕಡಿಮೆ ಮಾಡಲು, ಒಣಗುವುದನ್ನು ತಡೆಯಲು, ಸಂಗ್ರಹಣಾ ಅವಧಿಯನ್ನು ಹೆಚ್ಚಿಸಲು ಮತ್ತು ನೋಟವನ್ನು ಕಾಪಾಡಲು ಕೆಲವು ಆಹಾರ-ದರ್ಜೆಯ ಲೇಪನಗಳನ್ನು ಬಳಸಲಾಗುತ್ತದೆ. ಹಣ್ಣುಗಳ ಮೇಲೆ ಬಳಸುವ ಸಾಮಾನ್ಯ ಆಹಾರ-ದರ್ಜೆಯ ಲೇಪನಗಳಲ್ಲಿ ಬೀಸ್ ವ್ಯಾಕ್ಸ್ (Beeswax -E901), ಕಾರ್ನೌಬಾ ವ್ಯಾಕ್ಸ್ (Carnauba wax-E903) ಮತ್ತು ಶೆಲಾಕ್ (Shellac-E904) ಪ್ರಮುಖವಾಗಿವೆ. ಇವುಗಳನ್ನು ಆಹಾರ-ದರ್ಜೆಯಲ್ಲಿ, ಅನುಮೋದಿತ ಪ್ರಮಾಣದಲ್ಲಿ ಬಳಸಿದಾಗ ಹಣ್ಣಿನ ಮೇಲ್ಮಗೆ ರಕ್ಷಣಾತ್ಮಕ ಪದರ ಒದಗಿಸಲು ಸಹಾಯ ಮಾಡುತ್ತವೆ.ಕೆಲವು ಸಂದರ್ಭಗಳಲ್ಲಿ ಸೆಲ್ಯುಲೋಸ್ ಉತ್ಪನ್ನಗಳು, ಮಾರ್ಪಡಿಸಿದ ಪಿಷ್ಟ (modified starch), ಕೊಬ್ಬಿನ ಅಮ್ಲಗಳ ಕೆಲವು ಸಂಯುಕ್ತಗಳು ಮತ್ತು ಮೊನೊ- ಹಾಗೂ ಡೈಗ್ಲಿಸರೈಡ್ಗಳು (E471) ಮುಂತಾದ ಪದಾರ್ಥಗಳನ್ನೂ ಆಹಾರ ಲೇಪನಗಳ ಭಾಗವಾಗಿ ಬಳಸಬಹುದು. ಯಾವ ಪದಾರ್ಥವನ್ನು ಯಾವ ಹಣ್ಣಿನ ಮೇಲೆ ಬಳಸಬಹುದು ಎಂಬುದು ದೇಶದ ಆಹಾರ ಸುರಕ್ಷತಾ ನಿಯಮಗಳ ಮೇಲೆ ಅವಲಂಬಿತವಾಗಿರುತ್ತದೆ.
ಹಣ್ಣಿನ ಮೇಲೆ ಮೇಣದ ಲೇಪನವಿದೆ ಎಂಬ ಕಾರಣಕ್ಕೆ ಅದನ್ನು ವಿಷಕಾರಿ ಎಂದು ಪರಿಗಣಿಸುವುದು ಸರಿಯಲ್ಲ. ಆದರೆ ಆಹಾರಕ್ಕೆ ಅನುಮೋದನೆಯಿಲ್ಲದ ಕೈಗಾರಿಕಾ ಮೇಣ, ಅನಧಿಕೃತ ರಾಸಾಯನಿಕ ಅಥವಾ ಕಳಪೆ ಗುಣಮಟ್ಟದ ಲೇಪನ ಬಳಸಿದರೆ ಸಮಸ್ಯೆ ಉಂಟಾಗಬಹುದು. ಹಣ್ಣುಗಳನ್ನು ತಿನ್ನುವ ಮೊದಲು ಸ್ವಚ್ಚವಾದ ಹರಿಯುವ ನೀರಿನಲ್ಲಿ ಚೆನ್ನಾಗಿ ತೊಳೆಯುವುದು ಉತ್ತಮ ಅಭ್ಯಾಸ. ಕೈಯಿಂದ ಮೇಲ್ಮಯನ್ನು ನಿಧಾನವಾಗಿ ಉಜ್ಜಿ ತೊಳೆಯಬಹುದು. ಹಣ್ಣುಗಳ ಮೇಲೆ ಸಾಬೂನು, ಡಿಟರ್ಜೆಂಟ್ ಅಥವಾ ಮನೆಯ ಸ್ವಚ್ಚತಾ ರಾಸಾಯನಿಕಗಳನ್ನು ಬಳಸಬಾರದು.
ಸಂರಕ್ಷಕಗಳು: ಅನುಮೋದಿತ ಬಳಕೆ ಸುರಕ್ಷಿತ, ಅತಿಯಾದ ಬಳಕೆ ಆರೋಗ್ಯಕ್ಕೆ ಅಪಾಯ
ಇಂದಿನ ಜೀವನ ಶೈಲಿಯಲ್ಲಿ ಪ್ಯಾಕೆಟ್ ಆಹಾರ, ತಂಪು ಪಾನೀಯ, ಸಾನ್, ಜ್ಯಾಂ, ಉಪ್ಪಿನಕಾಯಿ, ಬೇಕರಿ ಉತ್ಪನ್ನಗಳು ಹಾಗೂ ವಿವಿಧ ಸಂಸ್ಕರಿತ ಆಹಾರಗಳ ಬಳಕೆ ಹೆಚ್ಚಾಗಿದೆ. ಇಂತಹ ಆಹಾರಗಳು ಬೇಗ ಹಾಳಾಗದಂತೆ ಹಾಗೂ ಅವುಗಳ ಸಂಗ್ರಹಣಾ ಅವಧಿಯನ್ನು ಹೆಚ್ಚಿಸಲು ಕೆಲವು ಸಂರಕ್ಷಕಗಳನ್ನು (Preservatives) ಬಳಸಲಾಗುತ್ತದೆ. ಇವು ಬ್ಯಾಕ್ಟಿರಿಯಾ, ಈಸ್ಟ್ ಮತ್ತು ಶಿಲೀಂಧ್ರಗಳ ಬೆಳವಣಿಗೆಯನ್ನು ನಿಯಂತ್ರಿಸುವ ಮೂಲಕ ಆಹಾರ ಹಾಳಾಗುವುದನ್ನು ನಿಧಾನಗೊಳಿಸುತ್ತವೆ.
ಸಾಮಾನ್ಯವಾಗಿ ಆಹಾರದಲ್ಲಿ ಬಳಸುವ ಸಂರಕ್ಷಕಗಳಲ್ಲಿ ನೋಡಿಯಂ ಬೆಂಜೋಯೇಟ್ ಪೊಟ್ಯಾಸಿಯಂ ಸರ್ಬೇಟ್ ಸೋರ್ಬಿಕ್ ಆಮ್ಲ, ಸಟ್ಗಳು, ಸೋಡಿಯಂ ಮೆಟಾಬೈಲೈಟ್, ಕ್ಯಾಲ್ಸಿಯಂ ಪ್ರೊಪಿಯೊನೇಟ್ ಹಾಗೂ ಕೆಲವು ಸಂಸ್ಕರಿತ ಮಾಂಸಗಳಲ್ಲಿ ಸೋಡಿಯಂ ನೈಟೈಟ್ ಪ್ರಮುಖವಾಗಿವೆ. ಸಟ್ಗೆ ಸಂವೇದನಾಶೀಲರಾಗಿರುವವರಲ್ಲಿ ಉಬ್ಬಸ ಅಥವಾ ಉಸಿರಾಟದ ತೊಂದರೆ ಉಂಟಾಗಬಹುದು. ಸಂಸ್ಕರಿತ ಮಾಂಸದಲ್ಲಿ ಬಳಸುವ ಸೋಡಿಯಂ ನೈಟೈಟ್ ಬ್ಯಾಕ್ಟಿರಿಯಾ ಬೆಳವಣಿಗೆಯನ್ನು ನಿಯಂತ್ರಿಸುತ್ತದೆ; ಅದರೆ ಕೆಲವು ಪರಿಸ್ಥಿತಿಗಳಲ್ಲಿ ನೈಟ್ರೋಸಮ್ಮನ್ಗಳ ರಚನೆಗೆ ಕಾರಣವಾಗಬಹುದು. ಕೆಲವು ನೈಟ್ರೋಸಮೈನ್ಗಳು ಕ್ಯಾನ್ಸರ್ ಅಪಾಯಕ್ಕೆ ಸಂಬಂಧಿಸಿವೆ.
ಆಹಾರವನ್ನು ಹೆಚ್ಚು ಕಾಲ ತಾಜಾವಾಗಿಡಲು ಫಾರ್ಮಾಲ್ಡಿಹೈಡ್ (Formaldehyde) ಬಳಸಲಾಗುತ್ತಿದೆ. ಆದರೆ ಇದು ಆಹಾರ ಸಂರಕ್ಷಕವಲ್ಲ: ಕೈಗಾರಿಕಾ ರಾಸಾಯನಿಕವಾಗಿದ್ದು, ಆಹಾರದ ಮೂಲಕ ಸೇವಿಸುವುದು ಆರೋಗ್ಯಕ್ಕೆ ಅಪಾಯಕಾರಿ. ಹೆಚ್ಚಿನ ಪ್ರಮಾಣದಲ್ಲಿ ಬಳಸಿದರೆ ಕಣ್ಣು, ಮೂಗು ಮತ್ತು ಗಂಟಲಿನಲ್ಲಿ ಉರಿ, ವಾಕರಿಕೆ, ವಾಂತಿ ಹಾಗೂ ಉಸಿರಾಟದ ತೊಂದರೆ ಉಂಟಾಗಬಹುದು. ಬೋರಿಕ್ ಆಮ್ಲ (Boric acid) ಮತ್ತು ಬೋರಾಕ್ಸ್ (Borax) ಮುಂತಾದ ಪದಾರ್ಥಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸಿದರೆ ವಾಕರಿಕೆ, ವಾಂತಿ, ಹೊಟ್ಟೆನೋವು ಮತ್ತು ಅತಿಸಾರ ಉಂಟಾಗಬಹುದು. ತೀವ್ರ ಒಡ್ಡಿಕೊಳ್ಳುವಿಕೆ ಮೂತ್ರಪಿಂಡ ಸೇರಿದಂತೆ ಪ್ರಮುಖ ಅಂಗಗಳಿಗೆ ಹಾನಿ ಉಂಟುಮಾಡಬಹುದು.ಅನುಮತಿಗಿಂತ ಹೆಚ್ಚಿನ ಸಂರಕ್ಷಕವೂ ಅಪಾಯಕಾರಿಯೇ. ನಿಗದಿತ ಮಿತಿಗಿಂತ ಹೆಚ್ಚು ಬಳಸಿದರೆ ಆರೋಗ್ಯಕ್ಕೆ ಹಾನಿಯಾಗಬಹುದು. ಆದ್ದರಿಂದ ಪ್ಯಾಕೆಟ್ ಆಹಾರ ಖರೀದಿಸುವಾಗ ಘಟಕಗಳು, ಆಹಾರ ಸೇರ್ಪಡೆಗಳು, ತಯಾರಿಕೆ ಮತ್ತು ಅವಧಿ ಮುಗಿಯುವ ದಿನಾಂಕವನ್ನು ಪರಿಶೀಲಿಸಿ.
ಬಣ್ಣದ ಹಿಂದೆ ಅಡಗಿರುವ ಆರೋಗ್ಯದ ಅಪಾಯ
ಆಹಾರವನ್ನು ಆಕರ್ಷಕವಾಗಿ ಕಾಣುವಂತೆ ಮಾಡಲು ಅನುಮೋದಿತ ಆಹಾರ ಬಣ್ಣಗಳನ್ನು ನಿಗದಿತ ಮಿತಿಯಲ್ಲಿ ಬಳಸಬಹುದು. ಟಾಟ್ರ್ರಜಿನ್, ಸನ್ಸೆಟ್ ಯೆಲ್ಲೋ FCF, ಕಾರ್ಮೊಯಿಸಿನ್, ಪೊನ್ನೋ 4R ಮತ್ತು ಬ್ರಿಲಿಯಂಟ್ ಬ್ಲೂ FCF ಮುಂತಾದ ಬಣ್ಣಗಳು ಕೆಲವು ದೇಶಗಳಲ್ಲಿ ನಿಗದಿತ ಆಹಾರಗಳಲ್ಲಿ ಮತ್ತು ನಿಗದಿತ ಮಿತಿಯಲ್ಲಿ ಬಳಕೆಗೆ ಅನುಮೋದಿತವಾಗಿವೆ. ಅನುಮೋದನೆ ಮತ್ತು ಬಳಕೆಯ ಮಿತಿಗಳು ದೇಶದ ಆಹಾರ ಸುರಕ್ಷತಾ ನಿಯಮಗಳ ಪ್ರಕಾರ ಬದಲಾಗಬಹುದು. ಆದರೆ ರೋಡಮೈನ್-B, ಮೆಟಾನಿಲ್ ಯೆಲ್ಲೋ, ಆರೆಂಜ್ II ಮತ್ತು ಮಾಲಕೈಟ್ ಗ್ರೀನ್ ಮುಂತಾದ ಅನುಮೋದನೆಯಿಲ್ಲದ ಕೈಗಾರಿಕಾ ಬಣ್ಣಗಳನ್ನು ಆಹಾರದಲ್ಲಿ ಬಳಸುವುದು ಅಪಾಯಕಾರಿ. ಇವುಗಳ ಅತಿಯಾದ ಅಥವಾ ದೀರ್ಘಕಾಲದ ಸೇವನೆಯಿಂದ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗಬಹುದು. ಆದ್ದರಿಂದ ಅಸಹಜವಾಗಿ ಹೊಳೆಯುವ, ಅತಿಯಾದ ಬಣ್ಣ ಹೊಂದಿರುವ ಅಥವಾ ಲೇಬಲ್ ಇಲ್ಲದ ಅಹಾರಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಅಗತ್ಯ.
ರಾಸಾಯನಿಕಗಳಿಗಿಂತ ದೊಡ್ಡ ಸಮಸ್ಯೆ – ಆಹಾರ ಕಲಬೆರಕೆ
ಆಹಾರ ಕಲಬೆರಕೆಯೂ ಆರೋಗ್ಯಕ್ಕೆ ಗಂಭೀರ ಅಪಾಯವಾಗಿದೆ. ಆಹಾರದ ತೂಕ, ಬಣ್ಣ, ರುಚಿ ಅಥವಾ ನೋಟ ಹೆಚ್ಚಿಸಲು ಕಡಿಮೆ ಗುಣಮಟ್ಟದ ಅಥವಾ ಅನುಮೋದನೆಯಿಲ್ಲದ ಪದಾರ್ಥಗಳನ್ನು ಸೇರಿಸುವುದು ಕಲಬೆರಕೆಯಾಗಿದೆ ಹಾಲಿನಲ್ಲಿ ನೀರು, ಪಿಷ್ಟ, ಯೂರಿಯಾ ಅಥವಾ ಅನುಚಿತ ಪದಾರ್ಥಗಳು, ಖಾದ್ಯ ತೈಲದಲ್ಲಿ ಅರ್ಗಮೋನ್ ಎಣ್ಣೆ, ಮಸಾಲೆಗಳಲ್ಲಿ ಕೃತಕ ಬಣ್ಣಗಳು, ಧೂಳು ಅಥವಾ ಇತರ ಪದಾರ್ಥಗಳನ್ನು ಸೇರಿಸುವ ಸಾಧ್ಯತೆಯಿದೆ.
ರೋಡಮೈನ್-B ಮತ್ತು ಮೆಟಾನಿಲ್ ಯೆಲ್ಲೋ ಮುಂತಾದ ಕೈಗಾರಿಕಾ ಬಣ್ಣಗಳು ಆಹಾರಕ್ಕೆ ಸೂಕ್ತವಲ್ಲ. ಜೇನುತುಪ್ಪದಲ್ಲಿ ಸಕ್ಕರೆ ಸಿರಪ್ ಬೆರೆಸುವುದರಿಂದ ಅದರ ನೈಸರ್ಗಿಕತೆ ಮತ್ತು ಪೌಷ್ಟಿಕ ಗುಣಮಟ್ಟ ಕಡಿಮೆಯಾಗಬಹುದು. ಆಹಾರ ಕಲಬೆರಕೆಯ ಪರಿಣಾಮವು ಯಾವ ಪದಾರ್ಥ, ಎಷ್ಟು ಪ್ರಮಾಣ ಮತ್ತು ಎಷ್ಟು ಕಾಲ ಸೇವಿಸಲಾಗಿದೆ ಎಂಬುದರ ಮೇಲೆ ಅವಲಂಬಿತವಾಗಿರುತ್ತದೆ. ಆದ್ದರಿಂದ ಅಸಹಜ ಬಣ್ಣ, ವಾಸನೆ ಅಥವಾ ಆಸಹಜವಾಗಿ ಕಾಣುವ ಆಹಾರವನ್ನು ಖರೀದಿಸುವುದನ್ನು ತಪ್ಪಿಸಿ, ಪ್ಯಾಕೆಟ್ ಆಹಾರದಲ್ಲಿ ಘಟಕಗಳ ಪಟ್ಟಿ, FSSAI ಮಾಹಿತಿ, ತಯಾರಿಕೆ ಮತ್ತು ಅವಧಿ ಮುಗಿಯುವ ದಿನಾಂಕ ಪರಿಶೀಲಿಸುವುದು ಉತ್ತಮ.
ತಿನ್ನುವ ಮೊದಲು ಎಚ್ಚರ, ಖರೀದಿಸುವಾಗ ಪರಿಶೀಲನೆ
ಆಹಾರದಲ್ಲಿನ ರಾಸಾಯನಿಕಗಳನ್ನು ಸಂಪೂರ್ಣವಾಗಿ ತಪ್ಪಿಸುವುದು ಸಾಧ್ಯವಿಲ್ಲ. ಅನುಮೋದಿತ ಮತ್ತು ಅನುಮೋದನೆಯಿಲ್ಲದ ರಾಸಾಯನಿಕಗಳ ವ್ಯತ್ಯಾಸ ತಿಳಿದುಕೊಳ್ಳಬೇಕು. ಹಣ್ಣು-ತರಕಾರಿಗಳನ್ನು ಚೆನ್ನಾಗಿ ತೊಳೆದು, ಹಾನಿಗೊಳಗಾದ ಭಾಗಗಳನ್ನು ತೆಗೆದುಹಾಕಬೇಕು. ಪ್ಯಾಕೆಟ್ ಆಹಾರದ ಲೇಬಲ್, ಘಟಕಗಳು ಮತ್ತು ಅವಧಿ ಪರಿಶೀಲಿಸಬೇಕು. ಅನುಮಾನಾಸ್ಪದ ಆಹಾರವನ್ನು ತಪ್ಪಿಸಿ, ವಿಶ್ವಾಸಾರ್ಹ ಮಾರಾಟಗಾರರಿಂದ ಖರೀದಿಸಬೇಕು. ಕಲಬೆರಕೆ ಕಂಡುಬಂದರೆ ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ದೂರು ನೀಡಬೇಕು.
ಭಯವಲ್ಲ, ವೈಜ್ಞಾನಿಕ ಅರಿವು; ನಿರ್ಲಕ್ಷ್ಯವಲ್ಲ, ಜಾಗೃತಿಯೇ ಅಗತ್ಯ
ಸಾಮಾಜಿಕ ಜಾಲತಾಣಗಳಲ್ಲಿ ಹರಡುವ “ಎಲ್ಲಾ ಹಣ್ಣು-ತರಕಾರಿಗಳಲ್ಲೂ ವಿಷಕಾರಿ ರಾಸಾಯನಿಕಗಳಿವೆ” ಎಂಬ ಮಾಹಿತಿಯನ್ನು ಪರಿಶೀಲಿಸದೆ ನಂಬಬಾರದು. ರಾಸಾಯನಿಕದ ಸ್ವರೂಪ, ಪ್ರಮಾಣ ಮತ್ತು ಅವಶೇಷದ ಮಟ್ಟವೇ ಆದರ ಸುರಕ್ಷತೆಯನ್ನು ನಿರ್ಧರಿಸುತ್ತವೆ. ಅನುಮೋದಿತ ರಾಸಾಯನಿಕವನ್ನು ನಿಯಮಾನುಸಾರ ಬಳಸುವುದಕ್ಕೂ, ಅಕ್ರಮವಾಗಿ ಅಥವಾ ಅತಿಯಾದ ಪ್ರಮಾಣದಲ್ಲಿ ಬಳಸುವುದಕ್ಕೂ ದೊಡ್ಡ ವ್ಯತ್ಯಾಸವಿದೆ.
ರೈತರು ಸುರಕ್ಷಿತ ಕೃಷಿ ಪದ್ಧತಿಗಳನ್ನು ಅನುಸರಿಸಿ, ವ್ಯಾಪಾರಿಗಳು ಆಹಾರ ಸುರಕ್ಷತಾ ನಿಯಮಗಳನ್ನು ಪಾಲಿಸಬೇಕು. ಸರ್ಕಾರ ಪರಿಣಾಮಕಾರಿ ಮೇಲ್ವಿಚಾರಣೆ ನಡೆಸಬೇಕು. ಗ್ರಾಹಕರು ಲೇಬಲ್ ಪರಿಶೀಲಿಸಿ, ವಿಶ್ವಾಸಾರ್ಹ ಆಹಾರವನ್ನು ಆಯ್ಕೆ ಮಾಡಬೇಕು. ಆಹಾರದಲ್ಲಿ ರಾಸಾಯನಿಕಗಳ ಬಳಕೆಯನ್ನು ಸಂಪೂರ್ಣವಾಗಿ ತಡೆಯುವುದು ಮಾತ್ರ ಪರಿಹಾರವಲ್ಲ; ಸುರಕ್ಷಿತ ರಾಸಾಯನಿಕದ ಸರಿಯಾದ ಬಳಕೆ, ಅಕ್ರಮ ಬಳಕೆಯ ನಿಯಂತ್ರಣ, ಆಹಾರ ಕಲಬೆರಕೆಯ ವಿರುದ್ಧ ಕಠಿಣ ಕ್ರಮ ಮತ್ತು ಗ್ರಾಹಕರಲ್ಲಿ ವೈಜ್ಞಾನಿಕ ಅರಿವು ಮೂಡಿಸುವುದೇ ನಿಜವಾದ ಆಹಾರ ಸುರಕ್ಷತೆ.
ಹೊಲದಿಂದ ನಮ್ಮ ತಟ್ಟೆಯವರೆಗೆ ಪ್ರತಿಯೊಂದು ಹಂತದಲ್ಲೂ ಜವಾಬ್ದಾರಿ, ನಿಯಮಪಾಲನೆ ಮತ್ತು ಜಾಗೃತಿ ಇದ್ದಾಗ ಮಾತ್ರ ಸುರಕ್ಷಿತ ಆಹಾರವನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯ. ಆದ್ದರಿಂದ ಆಹಾರದ ಬಗ್ಗೆ ಭಯಪಡುವುದಕ್ಕಿಂತ, ಅದರ ಹಿಂದಿನ ವಿಜ್ಞಾನವನ್ನು ಅರಿತು ಜಾಗೃತಿಯಿಂದ ಆಯ್ಕೆ ಮಾಡುವುದು ಇಂದಿನ ಅಗತ್ಯ.
ಲೇಖಕಿ : ಡಾ. ಸುಬ್ಬಲಕ್ಷ್ಮಿ ಎನ್. ಕಾರಂತ್, ಸಹ ಪ್ರಾಧ್ಯಾಪಕರು, ರಸಾಯನಶಾಸ್ತ್ರ ವಿಭಾಗ.
ಶ್ರೀ ಮಧ್ವವಾದಿರಾಜ ತಾಂತ್ರಿಕ ಮತ್ತು ನಿರ್ವಹಣಾ ಸಂಸ್ಥೆ ಬಂಟಕಲ್, ಉಡುಪಿ.
