ಕಾಪುವಿನಲ್ಲಿ ಸಮುದ್ರ ಪ್ರಕ್ಷ್ಯಬ್ಧ: ಸಮುದ್ರಕ್ಕಿಳಿಯದಂತೆ ತಾಲೂಕು ಆಡಳಿತ ತಾಕೀತು
ಚಂಡ ಮಾರುತದ ಅಬ್ಬರದಿಂದಾಗಿ ಕಾಪುವಿನಲ್ಲೂ ಕಡಲು ಪ್ರಕ್ಷ್ಯಬ್ಧಗೊಂಡಿದೆ. ಆಪ್ರಯುಕ್ತ ಯಾರೂ ಸಮುದ್ರಕ್ಕೆ ಇಳಿಯದಂತೆ ಕಾಪು ತಾಲೂಕು ಆಡಳಿತ ತಾಕೀತು ಮಾಡಿದೆ.
ಕಾಪು ಬೀಚ್, ಲೈಟ್ ಹೌಸ್ ಸುತ್ತಮುತ್ತ, ಉಚ್ಚಿಲ, ಮೂಳೂರು, ಪೊಲಿಪು, ಉಳಿಯಾರಗೋಳಿ ಯಾರ್ಡ್ ಬೀಚ್ ಮತ್ತು ಕೈಪುಂಜಾಲ್ ಬೀಚ್ಗಳಲ್ಲಿಯೂ ಬೃಹತ್ ಅಲೆಗಳು ಏಳುತ್ತಿದ್ದು ಜನರಲ್ಲಿ ಆತಂಕಕ್ಕೆ ಕಾರಣವಾಗಿದೆ.
ಪ್ರಸಿದ್ಧ ಪ್ರವಾಸಿ ತಾಣವಾದ ಕಾಪು ಲೈಟ್ ಹೌಸ್ ಬಳಿ ಸಮುದ್ರ ದೊಡ್ಡದಾಗಿದ್ದು ಬೃಹತ್ ಅಲೆಗಳು ಮೇಲೇಳುತ್ತಾ ದಡವನ್ನು ತನ್ನ ಒಡಲಿನತ್ತ ಸೇರಿಸಿಕೊಳ್ಳುತ್ತಿದೆ.
ಬೃಹತ್ ಅಲೆಗಳು ಲೈಟ್ ಹೌಸ್ ಸುತ್ತಲಿನ ಬಂಡೆಗೆ ಅಪ್ಪಳಿಸಿ, ಆತಂಕ ಹೆಚ್ಚಿಸಿವೆ.
ಕಾಪು ಬೀಚ್ಗೆ ಆಗಮಿಸುವ ಪ್ರವಾಸಿಗರಿಗೆ ಸಮುದ್ರಕ್ಕಿಳಿಯದಂತೆ ಎಚ್ಚರಿಕೆ ಫಲಕಗಳನ್ನು ಅಳವಡಿಸಲಾಗಿದೆ.
ಕಾಪು ಪೊಲೀಸರು, ಗೃಹರಕ್ಷಕದಳ , ಜೀವರಕ್ಷಕ ದಳದ ಸಿಬಂದಿಗಳು ಬೀಚ್ನಲ್ಲಿ ಯಾರೂ ಸಮುದ್ರಕ್ಕೆ ಇಳಿಯದಂತೆ, ಯಾವುದೇ ಅವಘಡಗಳು ಸಂಭವಿಸದಂತೆ ಮುನ್ನೆಚ್ಚರಿಕೆ ವಹಿಸಿದ್ದಾರೆ.
