ವರ್ಡ್ ಕ್ಯಾಂಪ್ ಏಷ್ಯಾ 2026 ಆಯೋಜನಾ ತಂಡಕ್ಕೆ ವಿ ಗೌತಮ್ ನಾವಡ ಸೇರ್ಪಡೆ
ನಾವಡರವರು ಭಾರತೀಯ ತಂತ್ರಜ್ಞಾನ ಉದ್ಯಮಿ, ಮುಕ್ತ ಮೂಲ ಸಮುದಾಯ ನಾಯಕ
(Udupi) ಉಡುಪಿ: ಫೋರ್ಥ್ಫೋಕಸ್ ಸಂಸ್ಥೆಯ ಸ್ಥಾಪಕ ಮತ್ತು ನಿರ್ದೇಶಕರಾದ ವಿ ಗೌತಮ್ ನಾವಡ ಅವರು ವರ್ಡ್ ಕ್ಯಾಂಪ್ ಏಷ್ಯಾ 2026 ಆಯೋಜನಾ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ.
ಅವರು ಈ ಕಾರ್ಯಕ್ರಮದ ಪ್ರಾಯೋಜಕತ್ವ ವಿಭಾಗದ ಎಂಟು ಆಯೋಜಕರಲ್ಲಿ ಒಬ್ಬರಾಗಿದ್ದಾರೆ. 2011ರಲ್ಲಿ ವರ್ಡ್ಪ್ರೆಸ್ ಬಳಸಲು ಆರಂಭಿಸಿದ ಅವರ ಪ್ರಯಾಣದಲ್ಲಿ ಇದು ಒಂದು ಪ್ರಮುಖ ಮೈಲುಗಲ್ಲಾಗಿದೆ.
ವರ್ಡ್ ಕ್ಯಾಂಪ್ ಏಷ್ಯಾ 2026 ಎಂಬ ಪ್ರಮುಖ ವರ್ಡ್ಪ್ರೆಸ್ ಸಮ್ಮೇಳನವು 2026 ಏಪ್ರಿಲ್ 9ರಿಂದ 11ರವರೆಗೆ ಮುಂಬೈನ ಜಿಯೋ ವರ್ಲ್ಡ್ ಕನ್ವೆನ್ಷನ್ ಸೆಂಟರ್ನಲ್ಲಿ ನಡೆಯಲಿದೆ. ಈ ಕಾರ್ಯಕ್ರಮದಲ್ಲಿ 70ಕ್ಕಿಂತ ಹೆಚ್ಚು ದೇಶಗಳಿಂದ 3,000ಕ್ಕೂ ಹೆಚ್ಚು ಮಂದಿ ಭಾಗವಹಿಸುವ ನಿರೀಕ್ಷೆಯಿದ್ದು, ವೆಬ್ ಅಭಿವೃದ್ಧಿಕಾರರು, ವೆಬ್ ವಿನ್ಯಾಸಕಾರರು, ಉದ್ಯಮಿಗಳು, ಶಿಕ್ಷಣ ತಜ್ಞರು ಮತ್ತು ಕೊಡುಗೆದಾರರು ಒಂದೇ ವೇದಿಕೆಯಲ್ಲಿ ಸೇರಲಿದ್ದಾರೆ.
ನಾವಡ ಅವರು, ಈವರೆಗೆ ಅವರು ಭಾರತದೆಲ್ಲೆಡೆ ನಡೆದ ಹಲವು ವರ್ಡ್ ಕ್ಯಾಂಪ್ಗಳಲ್ಲಿ ಭಾಷಣ ಮಾಡಿದ್ದಾರೆ. ಭಾರತದಲ್ಲಿ ಅನೇಕ ವರ್ಡ್ ಕ್ಯಾಂಪ್ಗಳಿಗೆ ಪ್ರಾಯೋಜಕರಾಗಿ, ಆಫ್ರಿಕಾದ ವರ್ಡ್ ಕ್ಯಾಂಪ್ ಮಸಾಕ 2025 ಅನ್ನು ಸಹ ಪ್ರಾಯೋಜಿಸಿದ್ದಾರೆ. ಆರಂಭಿಕ ವರ್ಡ್ಪ್ರೆಸ್ ಬಳಕೆದಾರರಿಂದ ಭಾಷಣಕಾರ, ಪ್ರಾಯೋಜಕ ಮತ್ತು ಸಮುದಾಯ ಆಯೋಜಕರಾಗುವ ತನಕ ಅವರ ಪಯಣವು ವರ್ಡ್ಪ್ರೆಸ್, ಮುಕ್ತ ಮೂಲ ತಂತ್ರಜ್ಞಾನ ಮತ್ತು ಸಮುದಾಯ ನಿರ್ಮಾಣದ ಮೇಲಿನ ದೀರ್ಘಕಾಲದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.
ಜಾಗತಿಕ ವರ್ಡ್ ಕ್ಯಾಂಪ್ ಪಾಲ್ಗೊಳ್ಳುವಿಕೆಯ ಜೊತೆಗೆ, ವಿ ಗೌತಮ್ ನಾವಡ ಅವರು ಕರಾವಳಿ ಕರ್ನಾಟಕದ ವರ್ಡ್ಪ್ರೆಸ್ ಉಡುಪಿ ಸಮುದಾಯ ಮೀಟ್ಅಪ್ ಗುಂಪಿನ ಸಹ ಸ್ಥಾಪಕರಾಗಿದ್ದಾರೆ. ಅವರ ನಾಯಕತ್ವದಲ್ಲಿ ಸಮುದಾಯವು ಇತ್ತೀಚೆಗೆ ಕ್ಯಾಂಪಸ್ ಕನೆಕ್ಟ್ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದು, ಕರಾವಳಿ ಕರ್ನಾಟಕದಾದ್ಯಂತ 300ಕ್ಕೂ ಹೆಚ್ಚು ವಿದ್ಯಾರ್ಥಿಗಳನ್ನು ವರ್ಡ್ಪ್ರೆಸ್, ಮುಕ್ತ ಮೂಲ ಕೊಡುಗೆ ಮತ್ತು ಡಿಜಿಟಲ್ ವೃತ್ತಿಜೀವನಕ್ಕೆ ಪರಿಚಯಿಸಿದೆ. ಈ ಉಪಕ್ರಮವನ್ನು ವರ್ಡ್ಪ್ರೆಸ್ ಸೆಂಟ್ರಲ್ ವತಿಯಿಂದ ಗುರುತಿಸಲಾಗಿದೆ.
“ನನಗೆ ಇದು ಅತ್ಯಂತ ವಿನಮ್ರತೆಯ ಕ್ಷಣ,” ಎಂದು ವಿ ಗೌತಮ್ ನಾವಡ ಹೇಳಿದರು. “2011ರಲ್ಲಿ ವರ್ಡ್ಪ್ರೆಸ್ ಬಳಸಲು ಆರಂಭಿಸಿದಾಗ ನಾನು ಒಮ್ಮೆ ಇಂತಹ ದೊಡ್ಡ ವರ್ಡ್ ಕ್ಯಾಂಪ್ನ ಆಯೋಜನಾ ತಂಡದ ಭಾಗವಾಗುತ್ತೇನೆ ಎಂದು ಕನಸಲ್ಲೂ ಯೋಚಿಸಿರಲಿಲ್ಲ. ಇಂದು ವರ್ಡ್ ಕ್ಯಾಂಪ್ ಏಷ್ಯಾ 2026 ಆಯೋಜಿಸುವ ಅವಕಾಶ ನನಗೆ ನನ್ನ ಪ್ರಯಾಣದ ಒಂದು ಸಂಪೂರ್ಣ ವೃತ್ತದಂತಿದೆ.” ಎಂದು ವಿ ಗೌತಮ್ ನಾವಡ ಹೇಳಿದ್ದಾರೆ.
