ಭವಾನಿ ಫೌಂಡೇಶನ್ ನಿಂದ ಶೌಚಾಲಯ ನಿರ್ಮಾಣ ಮತ್ತು ಶಾಲಾ ಸಾಮಗ್ರಿಗಳ ವಿತರಣೆ
ಕಾರ್ಯಕ್ರಮ ಉದ್ಘಾಟಿಸಿದ ಭವಾನಿ ಫೌಂಡೇಶನ್‌ನ ಸ್ಥಾಪಕ ಅಧ್ಯಕ್ಷ ಕೆ.ಡಿ. ಶೆಟ್ಟಿ
(Mumbai) ಮುಂಬಯಿ: ಜೆಎನ್‌ಪಿಎ ಆವರಣದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಭವಾನಿ ಶಿಪ್ಪಿಂಗ್ ಸರ್ವಿಸ್ ಕಂಪನಿ ನಿರ್ವಹಿಸುವ ಭವಾನಿ ಫೌಂಡೇಶನ್ ವತಿಯಿಂದ ಅಂಬರ್‌ನಾಥ್‌ನಲ್ಲಿರುವ ಕರ್ನಾಟಕದ ವೈಭವ ನಮಸ್ತೆ ಸಂಸ್ಥೆಯ ನೀಜಲಿಂಗಪ್ಪ ಪ್ರಾಥಮಿಕ ಹಾಗೂ ಮಾಧ್ಯಮಿಕ ಕನ್ನಡ ಶಾಲಾ ಪುರುಷ ಮತ್ತು ಮಹಿಳಾ ವಿದ್ಯಾರ್ಥಿಗಳಿಗಾಗಿ ಹತ್ತು ಲಕ್ಷ ರೂಪಾಯಿ ವೆಚ್ಚದಲ್ಲಿ ಶೌಚಾಲಯವನ್ನು ನಿರ್ಮಿಸಲಾಗಿದೆ.
ಸಾಮಾಜಿಕ ಬದ್ಧತೆಯಿಂದಾಗಿ, ಈ ಸ್ವತಂತ್ರ ಶೌಚಾಲಯಗಳು ಶಾಲಾ ಮಕ್ಕಳ ಅನಾನುಕೂಲತೆಯನ್ನು ಹೋಗಲಾಡಿಸಲು ಸಹಾಯ ಮಾಡಲಿವೆ.
ಈ ಶೌಚಾಲಯದ ಉದ್ಘಾಟನಾ ಸಮಾರಂಭವನ್ನು ಭವಾನಿ ಫೌಂಡೇಶನ್‌ನ ಸ್ಥಾಪಕ ಅಧ್ಯಕ್ಷ ಕೆ.ಡಿ. ಶೆಟ್ಟಿ ನೆರವೇರಿಸಿದರು.
ಭವಾನಿ ಶಿಪ್ಪಿಂಗ್‌ನ ವ್ಯವಸ್ಥಾಪಕ ನಿರ್ದೇಶಕಿ ಶ್ರೀಮತಿ ಜಿಕ್ಸಿತ್ ಶೆಟ್ಟಿ ಅಧ್ಯಕ್ಷತೆ ವಹಿಸಿದ್ದರು.
ಸಂಸ್ಥೆಯ ವತಿಯಿಂದ ವಿದ್ಯಾರ್ಥಿಗಳಿಗೆ ಪುಸ್ತಕ, ಶಾಲಾ ಪರಿಕರಗಳನ್ನು ವಿತರಿಸಲಾಯಿತು.
ಈ ಸಂದರ್ಭದಲ್ಲಿ, ಭವಾನಿ ಫೌಂಡೇಶನ್‌ನ ಮಾಜಿ ಅಧ್ಯಕ್ಷೆ ಆರ್.ಬಿ. ಹೆಬ್ಲಿ, ಕಾರ್ಯದರ್ಶಿ ಶ್ರೀಮತಿ ಶಿಖಾ ಶೆಟ್ಟಿ, ಅಂಬಿಕಾ ಹೊಟೇಲ್ ಮಾಲಕ ಪ್ರಭಾಕರ ಶೆಟ್ಟಿ, ಕರ್ನಾಟಕ ವೈಭವ ನಮಸ್ತೆ ಸಂಸ್ಥೆಯ ಅಧ್ಯಕ್ಷ ತಿಲಕ್ ಚಲವಾದಿ, ಉಪಾಧ್ಯಕ್ಷ ಎಚ್.ಎನ್. ಇಂಗನೂರು, ಕಾರ್ಯದರ್ಶಿ ಬಸವಂತ ಪೂಜಾರಿ, ಶಾಲಾ ಮುಖ್ಯೋಪಾಧ್ಯಾಯಿನಿ ಅನಿತಾ ರಾಜೋಳಿ, ಶಿಕ್ಷಕ ವೃಂದ ಹಾಗೂ ಗಣ್ಯರು ಉಪಸ್ಥಿತರಿದ್ದರು.
